तीब्र दबावपछि डा.शेखर उम्मेदवार बन्दै



काठमाडौं। नेपाली कांग्रेस संसदीय दलको नेता पदका लागि हुने चुनावमा डा. शेखर कोइराला उम्मेदवार बन्ने भएका छन्। कार्यकर्ता तथा नवनिर्वाचित सांसदहरुको तीब्र दवाबपछि नेता कोइराला उम्मेदवार बन्न लागेका हुन् ।

डा. कोइरालाले उम्मेदवारका रुपमा सांसद्हरुसँग सहयोग माग्न समेत थालिसकेको जानकारी प्राप्त भएको छ ।

कांग्रेस संसदीय दलको नेता पदका लागि पार्टी सभापति तथा प्रधानमन्त्री शेरबहादुर देउवा उम्मेदवार बन्ने निश्चित जस्तै छ । त्यसैगरी महामन्त्री गगन थापाले पनि उम्मेदवारी घोषणा गरेका छन् ।

गगन र शेखर विगतमा एउटै टिममा थिए । सभापति शेरबहादुर नेतृत्वको संस्थापन टिमको विरुद्धमा शेखरकै टिमबाट गगनले महामन्त्री पदको उम्मेदवारी दिएका थिए । तर, संसदीय दलको नेता पदमा उम्मेदवारी दिने घोषणा भने डा. शेखरले भन्दा गगनले पहिले नै गरेका हुन् ।

शेखर नै किन ?

देउवा इतर पक्षबाट डा. शेखर र गगन दुवैजनाको उम्मेदवारी दौड चलिरहेको छ । जानकारहरुका अनुसार यो टिमबाट एकजना सर्वसम्मत उम्मेदवार बनाउने प्रयास पनि सुरु भइसकेको छ । ‘गगन र शेखर जसको पक्षमा धेरै सांसद देखिन्छन्, उही उम्मेदवार बन्ने र अर्काेले छाड्ने विषयमा सहमतिको खोजी भइरहेको छ’ एक नवनिर्वाचित सांसदले बताए । उनका अनुसार शेखर र गगन दुवैजना उम्मेदवार बन्नु भनेको देउवालाई सघाउनु हो । देउवाको राज अन्त्य गर्ने हो भने एकजना मात्र उम्मेदवार बन्नुपर्ने धारणा कांग्रेस संस्थापन इतर पक्षमा व्यापक भएको छ ।

डा. शेखरले भने उम्मेदवारीको मैदान नछाड्ने बताउनुभएको बुझिएको छ । आज बिहान आफ्नो निवासमा कांग्रेसका केही केन्द्रीय सदस्य र सांसदहरुबीच कुराकानी गर्दै डा. शेखरले अब मैदानमा आइसकेको हुनाले उम्मेदवारीबाट व्याक नहुने बताए ।

डा. शेखरको उम्मेदवारीका अनेक कारण भएको बताइएको छ । आफ्नो खेमाको अस्तित्व रक्षा र हैसियत वृद्धिका लागि शेखरले नै उम्मेदवारी दिनुपर्ने भन्दै केही नवनिर्वाचित सांसद र केन्द्रीय सदस्यहरुले लविङ गरिरहेका थिए । उनीहरुको भनाई अनुसार गगनले देउवा इतर खेमाको प्रतिनिधित्व गर्ने ग्यारेन्टी छैन । एक सांसदले भने, ‘गगनजी हिजो अर्कै गुटमा हुनुहुन्थ्यो, पछि हाम्रो खेमामा आउनुभयो, अब कुन खेमामा पुग्नुहुन्छ भन्ने शायद उहाँलाई नै थाहा छैन होला । अनि कसरी उहाँले देउवा विरोधी खेमाको प्रतिनिधित्व गर्न सक्नुहुन्छ ?’

डा. शेखर कोइराला नेतृत्वको गुट ०४७ सालमा बहुदलीय व्यवस्था आए लगत्तै सिर्जना भएको हो । सो खेमाको नेतृत्व विगतमा गिरिजाप्रसाद कोइराला, सुशिल कोइरालाले गर्नुभएको थियो । ‘तीन दशक पुरानो टिमलाई बिना कारण तितरवितर पार्न सकिन्न’– शेखर निकट एक केन्द्रीय सदस्यले भने– ‘हो, गगनजीले पहिले उम्मेदवारी घोषणा गर्नुभएको हो । अरुभन्दा पहिले उम्मेदवारी घोषणा गरेकै आधारमा उहाँलाई समर्थन गर्नुपर्छ भन्ने छैन ।’

शेखरको टिमको भावभूमि र आफ्नो निजी लोकप्रियताको बलमा गगनले महामन्त्री पदमा चुनाव जितेको ती केन्द्रीय सदस्यको धारणा थियो । उनको भनाई छ– ‘जुन खेमाबाट चुनाव जित्नुभयो, त्यो खेमालाई बलियो बनाउन गगनजीले शेखरलाई समर्थन गरेर उम्मेदवारीको मैदानबाट फिर्ता आउनुपर्छ ।’

देउवा इतर खेमाका देशभरीका कार्यकर्तालाई उत्साहित बनाउन, उनीहरुलाई सक्रिय गराउन र एकजुट बनाउन शेखरले उम्मेदवारी दिनैपर्ने धारणा कैयन केन्द्रीय सदस्यहरुले राख्दै आएका थिए ।

तर, गगनले भने पुस्तान्तरणको कुरालाई महत्वसाथ उठाइरहेका छन् । जनस्तरमा पनि गगनको उम्मेदवारीले तरंग ल्याइरहेको छ । अर्का महामन्त्री विश्वप्रकाश शर्माले समर्थन गरेपछि गगनको उम्मेदवारीको वजन थप बढेको छ । विश्वप्रकाश शर्मा निकट एक केन्द्रीय सदस्यको भनाई छ ‘पुस्तान्तरणको कुरा शेरबहादुरजीमा मात्र लागू हुँदैन, शेखरमा पनि लागू हुन्छ । उहाँले गगनलाई छाडिदिए राम्रो ।’

उता, शेखर निकटहरु भने पुस्तान्तरणको कुरा मान्न तयार छैनन् । कुनै लाभको पद र सरकारमा नबसी डा. शेखरले निरन्तर कांग्रेसको अगुवाई गरिरहेको, कांग्रेसभित्र उत्साह भर्ने र आशा भरोसा जगाउने नेता भएको हुनाले शेखरलाई नै मौका दिनुपर्ने उनीहरुको भनाई छ ।

दोस्रो चरणको खेल

देउवा इतर खेमाबाट एकभन्दा धेरै उम्मेदवार भएको अवस्थामा दुवैको मत बाँडिने निश्चित छ । संसदीय दलको विधान अनुसार दलको नेतामा चुनिन ५१ प्रतिशत सदस्यको समर्थन आवश्यक पर्छ । पहिलो चरणको चुनावमा ५१ प्रतिशत कसैको आएन भने सबैभन्दा धेरै मत ल्याउने दुई उम्मेदवार बीच चुनाव हुन्छ । त्यो अवस्था आयो भने चाहिँ शेखर र गगनले नमिली सुखै नहुने देखिएको छ ।            यो पनि पढ्नुहोस                       संसदीय दलमा देउवासँग कोइराला लड्ने, गगनलाई फकाउने प्रयास जारी

Tags :

प्रकाशित: १ पुष २०७९, शुक्रबार १८:५६